Prokuroria e Posaçme Kundër Korrupsionit dhe Krimit të Organizuar, ka dhënë detaje në lidhje me arrestimin e sekretares së përgjithshme të Ministrisë së Shëndetësisë Joana Duro dhe punonjësja Laura Sheto.

Në një njoftim për mediat, SPAK bën me dije se nga hetimet ka rezultuar se Duro ka marrë një përfitim të parregullt në shumën prej 330.000 (treqind e tridhjetë mijë) lekë, për të favorizuar një Operator Ekonomik, për fitiminin e një tenderi.

Këto vlera monetare u dhanë nga Sheto e cila është me detyrë Specialiste e Nivelit të Lartë në Agjensinë e Ofrimit të Shërbimeve Publike të Integruara.

“Nga ndjekja me metoda speciale të hetimit janë grumbulluar prova të cilat kanë evidentuar se, një operator ekonomik do të jepte një përfitim të parregullt (në formën e shumave monetare) me qëllim shpalljen fitues në një procedure prokurimi të zhvilluar nga Ministria e Shëndetësisë e Mbrojtjes Sociale (në cilësinë e Autoritetit Kontraktor), Prokurimi në fjalë ishte me objekt “Lot 1 “Supervizim për rikonstruksionin e disa Qendrave Shëndetësore në qarqet Tiranë e Durrës”-njofton SPAK.

Sakaq mësohet se Duro e Sheto akuzohen për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Korrupsioni aktiv i funksionarëve të lartë shtetërorë ose të zgjedhurve vendorë”.

Gjithashtu u bë e mundur edhe sekuestrimi në cilësinë e proves materiale të shumës prej 330 000 (treqind e tridhjetë mijë) lekë, të cilat u gjetën në zyrën e Duros.

LEXONI GJITHASHTU: 

• Asgjësohen 500 fidanë kanabis në Krujë, kultivoheshin në 16 ambiente
• Arrestimi i Sekretares së Përgjithshme të MSH, vjen reagimi i Ramës
• Arrestohet sekretarja e përgjithshme e Ministrisë së Shëndetësisë