Arrestohen ekzekutorët e Renis Dobrës, njëri dëshmitar në vrasjen Azem Hajdarit

Dy persona janë arrestuar nga policia si autorët e dyshuar të vrasjes së 22-vjeçarit Renis Dobra, ngjarje e rëndë e ndodhur mbrëmjen e 8 korrikut në Madhesh të Ulzës.

Në pranga kanë rënë Petrit Çakrri, i kapur nga forcat e rendit në Lekbibaj të Tropojës, si dhe Fatjon Bushgjoka, i cili u ndalua në Tiranë. Të dy të dyshuarit ndodhen aktualisht në ambientet e Drejtorisë Vendore të Policisë Dibër, ndërsa autoritetet kanë shpallur në kërkim Kristi dhe Aleksandër Bushgjokën.

Sipas hetimeve, viktima po kthehej në banesë dhe ndodhej vetëm pak minuta larg shtëpisë, kur autorët e rrëmbyen. Pas një dhune barbare, ata dyshohet se e mbytën me litar dhe trupin e pajetë së bashku me automjetin e tij e hodhën në liqenin e Shkopetit. Dyshohet se gjatë rrokullisjes së makinës, trupi i 22-vjeçarit ka dalë nga automjeti dhe u gjet mëngjesin e 9 korrikut, gjatë kërkimeve të familjarëve.

Njëri nga të arrestuarit, Petrit Çakrri, është një emër i njohur për drejtësinë. Ai ka qenë dëshmitar okular i vrasjes së ish-deputetit të Partisë Demokratike, Azem Hajdari, mbrëmjen e 12 shtatorit 1998. Pas lirimit nga burgu disa muaj më parë, Çakrri dyshohet se ka ndryshuar mbiemrin, duke u regjistruar me identitetin Petrit Hoxha.

Hetimet zbuluan gjithashtu se Çakrri kishte marrë me qira në Rinas dy automjete, një “Range Rover” të zi dhe një “Honda” të bardhë, të cilat dyshohet se janë përdorur nga autorët për realizimin e krimit.

Policia vijon operacionet për kapjen e dy personave ende në arrati.

LEXONI GJITHASHTU:

• E hodhën me makinë drejt liqenit, zbardhen detaje të reja nga vdekja e 23-vjeçarit
• Mister pranë liqenit të Shkopetit/ 23-vjeçari gjendet i vdekur, makina brenda ujit