Arrestohet 22-vjeçari shqiptar në Itali, kapet me drogë në makinë

Një 22-vjeçar shqiptar është arrestuar nga autoritetet italiane pasi u kap në flagrancë duke kryer manovra të rrezikshme në rrugë. Gjatë ndalimit, policia italiane ka ushtruar kontroll ndaj të riut dhe automjetit të tij, ku ka zbuluar një sasi lënde narkotike.

Sipas burimeve policore, nën levën e frenave të dorës u gjetën 12 qese me kokainë të gatshme për shpërndarje. Gjithashtu, gjatë kontrollit u sekuestruan 350 euro, që dyshohet se janë përfituar nga aktiviteti i paligjshëm i trafikut të drogës.

I riu mbante me vete dy telefona, në të cilët hetuesit zbuluan komunikime me persona të ndryshëm, të cilët dyshohet se ishin blerës të lëndës narkotike. Autoritetet italiane kanë konfirmuar gjithashtu se 22-vjeçari ndodhej në territorin italian në mënyrë të paligjshme.

Hetimet për këtë rast vijojnë, ndërkohë që ndaj të riut rëndojnë disa akuza për veprimtari të paligjshme në territorin italian.