Arrestohet pas 3 orë ndjekjeje autori i plagosjes së dyfishtë në Malësi të Madhe

Policia e Shkodrës ka arrestuar autorin e plagosjes së dyfishtë në Malësinë e Madhe.

Lul Rakaj u vu në pranga pas kërkimeve intensive teksa policia ngriti pika kontrolli rreth zonës ku ndodhi ngjarja.

“Nisur nga fakti që autori ishte i armatosur, në ndihmë të  Drejtorisë Vendore të  Policisë Shkodër dhe të Komisariatit të Malësisë së Madhe, shkuan Forcat Kombëtare të Sigurisë, Njësia Shkodër dhe  dy grupe të Forcave Speciale RENEA, për të bërë të mundur neutralizimin dhe kapjen e autorit.

Ndërkohë, Shërbimet e Policisë Kufitare morën masa për bllokimin e kufirit  me qëllim mos lejimin e largimit drejt Malit të Zi, të autorit të dyshuar.

Pas afro tre orë ndjekjeje dhe kontrollesh, Forcat Speciale RENEA, në zonën e ballkonit të Tamarës, lokalizuan dhe rrethuan autorin e dyshuar duke i bërë thirrje që ai të dorëzohej.

Shtetasi L.R nuk iu përgjigj thirrjes për dorëzim, por tentoi disa herë që të dilte nga rrethimi duke përfituar edhe nga koha e keqe me reshje shiu dhe nga zona e pyllëzuar, por nuk ka mundur dot  të largohet dhe pas disa minutash në rrethim është kapur e vënë në pranga”, sqaron policia.

Ngjarja ndodhi mëngjesin e së dielës në fshatin Vrakë, në hyrje të një lokali, ku Rakaj qëlloi me armë zjarri duke lënë të plagosur shtetasit Besmir Qofi dhe Avenir Hasanaj të cilët u transportuan në spitalin rajonal të Shkodrës.

Nga ana e policisë ende nuk janë zbardhur motivet dhe rrethanat e ngjarjes.

LEXONI GJITHASHTU:

• EMRAT| Dy të plagosur me armë zjarri në Malësi të Madhe, identifikohet autori
• Fotot e makinës që u përdor në atentatin në Don Bosko, flasin të plagosurit