Arti kolektiv në Gjermani, artistët ukrainas bëhen bashkë për të treguar luftën

Sofiia Yesakova punon shumë. Ajo i ka dhënë jetë një vizatimi në shkallë të gjerë që tregon ushtarët ukrainas që kanë humbur jetën duke mbrojtur vendin.

Për shumë kohë, arti konsiderohej i pakuptimtë, por bashkimi i artistëve ukrainas në Berlin ka bërë që mendimi të ndryshojë.

 “Në dy muajt e parë nuk mund të prekja laps apo penel me dorë, s’mund të mendoja për asgjë. Çdo gjë dukej e kotë për shkak të luftës. Njerëzit po vdisnin, ndaj çfarë mund të vizatoja? Por kur erdha këtu, dhe gjatë dy javëve të fundit që kalova në Kiev, i thash jo dëshpërimit dhe nisa të vizatoja,” – tha Yesakova.

Arti kolektiv, i quajtur Komuniteti Kulturor Ukrainas, është krijuar me ndihmën e organizatave gjermane. Në këtë godinë 500 metra katrorëshe, dikur një shtëpi publike në qendër të kryeqytetit gjerman, jetojnë 18 artistë ukrainas.

 “Mendoj se Berlini është një metropol shumë i hapur. Një qytet ku shumë kultura ndërveprojnë dhe ku ka shumë hapësirë për njerëzit që të jetojnë dhe të takohen me njëri-tjetrin,” – u shpreh Sybill Schulz, themeluese e KKU-së.

Viktoria Temnova është nga Khersoni, një qytet në jug të Ukrainës i pushtuar nga trupat ruse. Në vendin e saj ajo ishte një fotografe e njohur mode. Ndërsa në Berlin, ajo po publikon fotot e qytetit të saj përpara luftës, për t’u treguar njerëzve fytyrën e vërtetë të shtëpisë së saj.

 “Qyteti im ka një tjetër fytyrë. Ai është një qytet ukrainas, por pa rregulla, për shkak të dikujt që donte të ushtronte dhunë ndaj qytetarëve,” – tha ajo.

Rreth 70 mijë refugjatë ukrainas ndodhen në Berlin. Secili prej tyre ka historinë e tij, dëshpërimin e tij, por edhe shpresën e tij.

Emigrantët dhe refugjatët sjellin gjithmonë diçka në vendet ku përfundojnë dhe ky rast nuk përbën përjashtim. Artistët që kanë ardhur këtu në Berlin kanë sjellë me vete artin e tyre personal, mënyrën se si ata e shohin botën.

LEXONI GJITHASHTU:

• Festivali i filmit në Dropull bën bashkë turistë dhe artistë