Artisti Oltsen Gripshi sjell ekspozitën me histori reale gjatë Komunizmit

Në tunelin në muzeun shtëpia me gjethe, ekspozita “errësirë” kujton jetët e humbura. Artisti Oltsen Gripshi risjell historinë e dhimbshme të persekutimeve që përjetoi familja e tij dhe cdokush që vuajti në atë regjim.

“Është nxitur nga një rrëfim vetjak, një formë vetëportreti pasi familja ime ka qenë e persekutuar nga regjimi komunist. Ekspozita është e gërshetuar me fotografi familjare, përveç fotografisë së vajzës sime që është me ngjyra për të dhënë mesazhin e shpresës”, tha Gripshi.

Dikur ky tunel ishte ndërtuar për të mbrojtur personat që survejonin jetën e çdo qytetari, ndërsa sot mban të vërtetën e hidhur të atij sistemi, shenjat, dhimbjen dhe jetën e lënë në mes. Simbolet, fotografitë rikthejnë të shkuarën që është e panjohur për shumë të tjerë.

“Midis fotografisë dhe instalacionit me 70 kanotiere të bardha, të varura përgjatë një tuneli 25 metra i gjatë për personat që nuk ia dolën regjimit”, tha artisti.

Kuratorja dhe njëherësh drejtoresha e muzeut shtëpia me gjethe, Etleva Demollari tregon rëndësinë e rrëfimit të së shkuarës nëpërmjet artit.

“Është si një rrugëtim në të kaluarën tonë të errët komuniste, por edhe një njohje drejt vetvetes, dhe të vërtetës. Mbyllet me nota optimist”, tha Demollari.

Nuk është kurrë e mjaftueshme të flasësh për të shkuarën, kështu pohon artisti.

As vizitorët nuk mungojnë sidomos te rinjtë të cilët shfaqin interes për të mësuar më shumë për Kohen e Komunizmit.

LEXONI GJITHASHTU:

• Valle e muzikë tradicionale në Festivalin Ballkanik në Korçë