Asgjësohen 11609 bimë kanabisi në zonat e Shkodrës, 1 i arrestuar

Policia e Shkodrës ka asgjësuar 11609 bimë të dyshuara narkotike cannabis sativa në kuadër të fazës së 10-të të megaoperacionit policor antikanabis të koduar “Alpe të pastra”.

Prej të cilave 11250 bimë u gjetën në fshatrat Pult, Shosh dhe Shalë, Shkodër; 239 bimë në fshatrat Arrë dhe Temal, Vau i Dejës dhe 120 bimë në fshatin Kabash, Pukë.

Policia mundi të identifikonte dhe arrestonte shtetasin R. F., 59 vjeç, banues në fshatin Kabash, Pukë, si autor i dyshuar i kultivimit të 120 bimëve narkotike të gjetura në fshatin Kabash, Pukë.

Ndërkohë, vijon puna për identifikimin dhe kapjen e shtetasve që dyshohet se kanë kultivuar bimët që janë gjetur në fshatrat e tjera.

Gjatë fazave të mëparshme të këtij megaoperacioni, janë asgjësuar në total 46 575 fidanë dhe bimë narkotike cannabis sativa, janë vënë në pranga 3 autorë të dyshuar dhe janë shpallur në kërkim 9 të tjerë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme hetimore.

LEXONI GJITHASHTU:

• Shpërndanin kokainë në Durrës| Arrestohet 39-vjeçari, nën hetim një adoleshent
• Mashtrimet 4.7 milionë euro përmes Call Center-ave, arrestohet në Himarë i dyshuari