Asgjësohen 4999 bimë kanabis në veri të Shqipërisë, 1 në pranga dhe 5 në kërkim

Për 3 ditë, 50 efektivë me ndihmën e 7 dronëve finalizuan fazën e gjashtë të megaoperacionit antidrogë “Alpe të pastra”. 4999 bimë cannabis sativa u asgjësuan, ndërsa 1 prej 6 autorëve të dyshuar të veprimtarisë kriminale u arrestua. 5 të tjerët janë shpallur në kërkim.

4180 bimë u asgjësuan në fshatin Vajush, Malësi e Madhe; 697 bimë në fshatin Mali Kolaj, Shkodër; 75 bimë në fshatin Berishë e Vogël, Fushë Arrëz dhe 47 bimë në fshatin Repisht, Malësi e Madhe.

Policia bën me dije se u vu në pranga shtetasi P. Gj., 54 vjeç, si dhe u shpallën në kërkim shtetasit Gj. Gj., 27 vjeç, K. Gj., 24 vjeç, N. Gj., 21 vjeç, M. H., 26 vjeç dhe F. N., 33 vjeç, të gjithë banues në fshatrat ku u gjetën të kultivuara bimët narkotike.

Gjatë fazave të mëparshme të këtij megaoperacioni, janë asgjësuar në total 3270 fidanë dhe bimë narkotike cannabis sativa, si dhe është identifikuar dhe shpallur në kërkim 1 shtetase, autore e dyshuar e një rasti të kësaj veprimtarie kriminale.

LEXONI GJITHASHTU:

• Shpërndanin drogë në Tiranë, arrestohen dy shtetas
• I shpallur në kërkim nga Italia për trafikim droge, arrestohet 26-vjeçari në Tiranë