Asnjë përfaqësues i PSG në mbrëmjen gala të “Topit të Artë”, zbulohet shkaku

Asnjë përfaqësues i Paris Saint-Germain nuk do të jetë i pranishëm në ceremoninë e ndarjes së çmimit “Topi i Artë”, e cila zhvillohet të hënën në mbrëmje në Teatrin Chatelet të Parisit.

Arsyeja është përplasja në orar me sfidën e shumëpritur ndaj Marsejës, e njohur ndryshe si “Le Classique”.

Fillimisht, kjo ndeshje ishte planifikuar të luhej të dielën, por kushtet e pafavorshme atmosferike në jug të Francës detyruan autoritetet ta shtynin atë me 24 orë, në përputhje me rregulloren e Ligue 1.

Si pasojë, ndeshja do të zhvillohet në të njëjtën kohë me ceremoninë e “Topit të Artë”, duke pamundësuar pjesëmarrjen e lojtarëve dhe stafit të PSG-së.

Ky vendim ka ngritur pikëpyetje dhe interpretime, pasi prania ose mungesa në ceremoni shpesh shihet edhe si një sinjal rreth fituesit të mundshëm të çmimit.

PSG ka plot tetë lojtarë të nominuar për “Topin e Artë” këtë vit, falë suksesit të trefishtë të klubit, që përfshinte edhe fitoren historike në Ligën e Kampionëve.

Mes kandidatëve kryesorë është Ousmane Dembélé, ndërsa emra të tjerë si Achraf Hakimi, Khvicha Kvaratskhelia, Vitinha, Fabian Ruiz, Nuno Mendes, Joao Neves dhe Gianluigi Donnarumma (i transferuar së fundmi te Manchester City) janë gjithashtu në listën e nominimeve.

Dembélé dhe Desire Doué, një tjetër talent i vlerësuar i skuadrës, nuk janë përfshirë në listën e Luis Enrique për ndeshjen ndaj Marsejës për shkak të dëmtimeve. Kjo u jep atyre mundësinë të zgjedhin nëse do të marrin pjesë në ceremoninë e çmimeve.

Në kontrast me PSG-në, ylli i ri Lamine Yamal ka përgatitur një festë të veçantë pas ceremonisë, duke ftuar rreth 20 miq dhe familjarë – një lëvizje që shihet si një paralajmërim për një sukses të mundshëm të tij, megjithëse ende nuk ka një konfirmim zyrtar.

Pavarësisht situatës, lojtarët e PSG-së do të jenë të fokusuar në synimin për të vijuar serinë e fitoreve në kampionat, duke kërkuar triumfin e pestë radhazi në Ligue 1.

LEXONI GJITHASHTU:

• Sot shpallet fituesi i Topit të Artë, kush janë pretendentët