Atentati me 2 të vrarë në Rinas, Prokuroria do të marrë në pyetje Emiljano Shullazin

Prokuroria e Tiranës pritet të marrë në pyetje Emiljano Shullazin për atentatin në Rinas ku humbën jetën Gilmando Dani dhe Mustafa Sheqeri.

Ai do të pyetet mbi dyshimet që ka për personat të cilët organizuan atentatin e 11 nëntorit.

Dani dhe Sheqeri u ekzekutuan vetëm pak minuta pasi kishin mbërritur në tokën shqiptare, sapo ishin kthyer nga Spanja.

Në rrethrrotullimin e Rinasit, një automjet tjetër iu zuri pritë, tre persona dolën prej tij dhe qëlluan me breshëri plumbash.

Mustafa Sheqeri i njohur edhe me emrin Muçi Shaljani ishte drejtues i mjetit, fillimisht mbeti i plagosur, ndërsa 4 ditë më vonë humbi jetën në spitalin e Traumës.

Gilmando Dani ishte pasagjer, si pasojë e të shtënave humbi jetën në vend.

Autorët dyshohet se u larguar në drejtim të Fushë Krujës ku vetëm pak minuta pas ngjarjes, makina e përdorur prej tyre u gjet e djegur në fshatin Halil.

Gilmando Dani njihej si krahu i djathtë i Emiljano Shullazit.

Ai u dënua me 12 vite burg për akuzat e gjobëvënies dhe krijim të grupit të strukturuar kriminal, ndërsa u lirua nga qelia në tetor të vitit 2024.