Atentati me 4 të plagosur në Tiranë, gjendet i djegur motori i përdorur nga autorët

Policia e Tiranës ka gjetur një motomjet të djegur, i cili dyshohet se është përdorur nga autorët e atentatit me 4 të plagosur të ndodhur mbrëmjen e së enjtes në kryeqytet.

Përmes një njoftimi policia bën me dije motori është gjetur në afërsi të fshatit Fikas, Mullet.

“Në vijim të kontrolleve të pandërprera dhe të veprimeve hetimore që po kryhen nga grupi i posaçëm hetimor, në drejtimin e Prokurorisë, me qëllim zbardhjen e rrethanave të ngjarjes së ndodhur më datë 17.04.2025, në Lundër, ku u qëllua me armë zjarri në drejtim të një automjeti me të cilin qarkullonin 4 shtetas, shërbimet e Policisë, ditën e sotme, kanë gjetur në afërsi të fshatit Fikas, Mullet, një motomjet të djegur, i cili dyshohet se është përdorur nga autorët e kësaj ngjarjeje”, bën me dije policia.

Ngjarja e rëndë ndodhi mbrëmjen e së enjtes në zonën e Lundrës në kryeqytet, ku katër persona u qëlluan me armë zjarri, mes tyre edhe dy të mitur, teksa udhëtonin në një automjet në unazën e madhe.

Shënjestër e atentatorëve, të cilët mendohet se ishin 2 persona me motor ka qenë një automjet G-Class Mercedes Benz, ku po udhëtonin 4 persona, të cilët kanë mbetur të plagosur.

Të plagosur janë A.S, 34 vjeç, K.M, 19 vjeç, dhe dy të mitur, D.D., 11 vjeç dhe M.D., 17 vjeç.

LEXONI GJITHASHTU:

• Autorët mund të kenë ngatërruar shënjestër, pistat e atentatit me 4 të plagosur
• Makina u qëllua në ecje nga rrethrrotullimi i Shkozës, si ndodhi atentati në Tiranë