“Athina nën presionin e BE” Ekathimerini: Spanja e acaruar me Greqinë për Shqipërinë

Greqia po përballet me presionin jo vetëm të Gjermanisë por edhe të Spanjës për bllokimin që ka vendosur t’i bëjë Shqipërisë në rrugën e saj drejt integrimit në Bashkimin Europian për shkak të çështjes së kryetarit të zgjedhur të Himarës, Fredi Beleri.

Kështu shkruan gazeta greke Ekathimerini në një artikull dedikuar konsultimeve diplomatike që pritet të zhvillohen këtë të mërkurë në një takim të përfaqësuesve të përhershëm në Bashkimin Europian.

Sipas gazetës greke, kancelari gjerman Olaf Scholz ka deklaruar përmes kanaleve diplomatike se procesi i anëtarësimit nuk duhet të jetë një çështje dypalëshe. Madje Ekathimerini thotë se edhe presidenca spanjolle e BE-së shfaqet veçanërisht e acaruar me qëndrimin e palës greke.

E përditshmja greke shkon edhe më tej e thotë se Athina po shqyrton hapësirën për “bllokimin” e fazës tjetër të procesit, i cili përfshin një raport që përshkruan të gjitha standardet për atë që duhet të ishte përmbushur nga Tirana.

Deri më tani Greqia ka refuzuar të nënshkruajë një letër të 27 vendeve anëtare drejtuar Komisionit Europian, që kërkon hapjen e kapitujve të parë në këtë proces pas përfundimit me sukses të fazës së parë të negociatave të njohur ndryshe si screening.

LEXONI GJITHASHTU:

• Incidenti për skulpturat antike, Mitsotakis: Nuk ndikon në marrëdhëniet me Britaninë
• Incident diplomatik Britani-Greqi, Sunak anulon takimin me Mitsotakis