Auditimi i pallateve të vjetër, inxhinieri: Të bëhet edhe në ndërtesat e reja

Nëpërmjet një projektvendimi, qeveria pritet të fillojë procesin e auditimit teknik të pallateve me më shumë se 50 vite vjetërsi.

Inxhinieri i ndërtimit Gëzim Beqaj tha në një intervistë për Euronews Albania se auditimi duhet bërë edhe për banesat që nisin ndërtimin sot.

“Në tërësinë e vet duhet të kesh një ent të pavarur i cili nuk ka lidhje as me politikën, as me qeverinë dhe ky që ne e quajmë urdhri i inxhinierit që është shumë i vonuar në Shqipëri, që ka nisur një proces po të ishte i ngritur do të ishte një arbitër i paanshëm,” – u shpreh Beqaj.

Sipas tij në momentin që qeveria merr këtë vendim duhet investuar shumë në këtë strukturë me të gjitha pajisjet e nevojshme.

Nëse auditimi zbulon se pallati ka nevojë për ndërhyrje, atëherë do të bëhet edhe një analizë financiare për të përcaktuar nëse ia vlen të riparohet apo të ndërtohet nga e para. Nëse vlera e riparimit të pallatit është më e madhe ose barazvlefshme me koston e ndërtimit nga e para, ai do të prishet.