Autor i disa vjedhjeve në Dibër dhe Durrës, vihet në pranga 21-vjeçari

Një 21-vjeçar i shpallur në kërkim nga Policia e Durrësit është vënë në pranga pasi akuzohet për vjedhjen e automjeteve në zona të ndryshme të Durrësit dhe qarkut të Dibrës, me qëllim shitjen e tyre te persona me precedent kriminal.

Operacioni policor i koduar “Markat” u finalizua falë informacioneve operative dhe bashkëpunimit mes Policisë së Durrësit, Komisariatit nr. 4 në Tiranë dhe Policisë së Bulqizës. Gjatë veprimeve hetimore u bë e mundur arrestimi në flagrancë i shtetasit me iniciale K. Ll., 21 vjeç, banues në Bulqizë.

I riu sapo kishte vjedhur një automjet tip Benz në fshatin Gjoricë, Bulqizë, dhe tentoi t’i shpëtonte policisë duke u larguar me shpejtësi drejt Tiranës. Shërbimet e Komisariatit nr. 4 arritën ta bllokojnë automjetin dhe të kapin autorin, të cilin më pas e dorëzuan tek Policia e Durrësit.

Hetimet zbuluan se 21-vjeçari ishte autor edhe i tre vjedhjeve të tjera automjetesh në lagjet nr. 15 dhe nr. 17 të Durrësit, si dhe i vjedhjes së sendeve personale në një tjetër mjet në lagjen nr. 15.

Gjatë kontrollit, policia sekuestroi katër automjetet e vjedhura, të markave Benz, Toyota, Volkswagen dhe Ford Focus, të cilat dyshohet se ai synonte t’i shiste te persona të përfshirë në vepra kriminale.

Në bashkëpunim me Prokurorinë, po vijon puna për të zbuluar vjedhje të tjera që dyshohet se janë kryer nga i arrestuari.

LEXONI GJITHASHTU:

• Këmbimi valutor sot/ Me sa lekë blihen e shiten valutat kryesore
• U akuzua për mashtrim dhe korrupsion në prokurim, lirohet Federica Mogherini