Azerbajxhan Airlines pezullon fluturimet në 7 qytete ruse pas rrëzimit të avionit

Azerbajxhan Airlines ka njoftuar pezullimin e fluturimeve në shtatë qytete ruse, një masë që vjen pas rrëzimit tragjik të një avioni të saj më 25 dhjetor në Kazakistan, gjatë një fluturimi me destinacion Grozny, Çeçeni. Lajmi është raportuar nga disa media ruse, duke përfshirë agjencinë Interfax.

Pavarësisht këtij pezullimi, linja ajrore ka konfirmuar se do të vazhdojë fluturimet në gjashtë qytete kryesore të Rusisë, përfshirë Moskën dhe Shën Petersburgun.

Ndërkohë, më herët gjatë ditës së sotme, një tjetër avion i Azerbajxhan Airlines, që ishte nisur për në qytetin rus Mineralnye Vody, u kthye në Baku. Kjo ndodhi pasi ekuipazhi u njoftua për mbylljen e një pjese të hapësirës ajrore në Rusinë jugore, sipas agjencisë TASS.

Burimet e qeverisë së Azerbajxhanit kanë konfirmuar ekskluzivisht për Euronews-in në Lyon se shkaku i rrëzimit të avionit ishte një raketë ruse tokë-ajër, e cila goditi avionin gjatë një aktiviteti ajror me dron mbi Grozny, në Çeçeni. Sipas burimeve, raketa shpërtheu pranë avionit dhe copëzat e saj goditën pasagjerët dhe ekuipazhin e kabinës.

Goditja ndodhi gjatë fluturimit mbi Detin Kaspik, ndërsa avioni, i cili ishte dëmtuar rëndë, nuk iu lejua të ulej në asnjë aeroport rus, pavarësisht kërkesave të pilotëve për një ulje emergjente. Si rezultat, avioni u detyrua të fluturonte mbi det drejt qytetit Aktau në Kazakistan. Sipas të dhënave të tjera, sistemet e navigimit GPS të avionit u bllokuan gjatë fluturimit mbi Detin Kaspik, duke përkeqësuar situatën.

Gjatë uljes, avioni shpërtheu në flakë duke shkaktuar vdekjen e 38 personave. 29 pasagjerë mbijetuan, ndërsa disa të plagosur janë ende nën kujdes intensiv.

LEXONI GJITHASHTU:

• “Avioni në Kazakistan u qëllua me raketë”- Rusia reagon ndaj hipotezave të hedhura
• “Pasagjeri i lutet Zotit”, dalin pamjet brenda avionit pak momente para rrëzimit
• Video dramatike/ Iu lut Zotit kur avioni ishte në ajër, e falenderon nga toka