Babai abuzoi me vajzën, reagon Avokati i Popullit: Kemi nisur hetim administrativ

Institucioni i Avokatit të Popullit ka reaguar pas ngjarjes së rëndë të abuzimit seksual në Fier, ku 36-vjeçari, Zamir Meta, dyshohet se ka abuzuar seksualisht me vajzën e tij të mitur të moshës 12-vjeçare. Në një deklaratë zyrtare, institucioni shpreh shqetësimin e thellë për rastin, duke theksuar se kjo ngjarje kërkon jo vetëm ndëshkim të autorit, por edhe një reflektim institucional e shoqëror për forcimin e mekanizmave të mbrojtjes së fëmijëve në situata të rënda sociale apo familjare.

Avokati i Popullit bën me dije se ka nisur një hetim administrativ gjithëpërfshirës, me qëllim evidentimin e çdo veprimi apo mosveprimi të institucioneve përgjegjëse që mund të kenë ndikuar në zhvillimin apo mosparandalimin e kësaj ngjarjeje. Sipas njoftimit, hetimi do të bazohet në parimet e legjislacionit shqiptar dhe Kodit të Drejtësisë Penale për të Mitur, me fokus analizimin e funksionimit të zinxhirit institucional të mbrojtjes së fëmijëve dhe adresimin e çdo mangësie sistemike.

“Avokati i Popullit ka marrë me iniciativë shqyrtimin e këtij rasti dhe ka nisur një hetim administrativ gjithëpërfshirës, i mbështetur në parimet e legjislacionit shqiptar dhe Kodit të Drejtësisë Penale për të Mitur, me qëllim evidentimin e veprimeve apo mosveprimeve nga institucionet përgjegjëse që mund të kenë ndikuar në zhvillimin ose mosparandalimin e kësaj ngjarjeje.

Ky proces do të synojë të analizojë funksionimin e zinxhirit institucional të mbrojtjes së fëmijëve dhe të adresojë çdo mangësi sistemike. Avokati i Popullit apelon me forcë për ruajtjen e privatësisë dhe dinjitetit të fëmijës viktimë.

Ekspozimi masiv i detajeve të ngjarjes, qoftë në media apo rrjete sociale, është një dëm i dyfishtë për të miturën dhe cenon rëndë të drejtën e saj për mbrojtje nga traumat e mëtejshme.

Institucioni i Avokatit të Popullit do të ndjekë me vëmendje e seriozitet ecurinë e hetimeve dhe masat që do të ndërmerren për mbrojtjen e mëtejshme të të miturës, duke bashkëpunuar me autoritetet përkatëse në çdo hap të këtij procesi”, thuhet në deklaratën e Avokatit të Popullit.

LEXONI GJITHASHTU:

• Dyshohet se abuzoi seksualisht me vajzën 12-vjeçe, kush është 36-vjeçari i arrestuar
• “Ndodhi vetëm një herë”- Akuzohet se abuzoi me të bijën, del në gjykatë 36-vjeçari