“Backstage Show”, ekspozita që na njeh me rrugëtimin e medias në Shqipëri

“Backstage Show” ishte ekspozita që u hap më 3 maj në sallën e Bibliotekës së Kryeministrisë, ku të pranishëm ishin gazetarë, artistë dhe kryeministri Edi Rama.

Me sloganin “Liria e Medias është Demokraci”, në këtë ekspozitë me kuratore Jetona Koçibelli u shfaqën episode të shumta të medias që pas rënies së komunizmit.

Letrat e burgut të Martin Lekës me Fatos Nanon në burgje, fotografi të momenteve të caktuara, blloqe shënimesh, sende personale, dokumente apo prova të ngjarjeve që kanë lënë gjurmë në mediat shqiptare, ishin paraqitur në këtë ekspozitë e cila u hap në kuadër të Ditës Ndërkombëtare të Lirisë së Medias.

Vetë kuratorja tregoi se si lindi ideja e kësaj ekspozite dhe sfidat me të cilat përballet media në vendin tonë.

“Hyra në arkivën e një gazete, pashë titujt dhe batutat që shkëmbeheshin më lindi ideja për të menduar drejt idealizimit. Kam dashur që përmes artefakteve, fotografive të krijojë këtë ekspozitë për të bërë pak reflektim në ditët e sotme”.

Gazetarja theksoi se historia e medias ka pasur momente të vështira, duke shtuar se sot gazetarët nuk janë të kërcënuar. Kjo ekspozitë do të qëndrojë e hapur deri më 9 maj.

LEXONI GJITHASHTU:

• Dita Botërore e Lirisë së Medias, ekspozitë me gazeta e revista në Gjirokastër
• Shqipëria e fundit në rajon për lirinë e medias, reagon kryeministri Rama