Balla nga Korça: Do të trajtohet problemi i banimit për policët

Ministri i Brendshëm Taulant Balla tha në një takim me strukturat drejtuese të Policisë Vendore të Korçës se është shumë i rëndësishëm përmirësimi i kushteve të shërbimit të çdo punonjësi policie.

Ai tha se shumë shpejt do të trajtohet problemi i banimit për uniformat blu, për ata që shërbejnë në qytete të ndryshme nga qyteti ku kanë familjen.

“Do të kujdesem posaçërisht për rritjen e standardit të jetesës të punonjësve të Policisë dhe përmirësimin e kushteve të shërbimit të çdo punonjësi policie, që nga kushtet financiare deri tek kushtet e strehimit kur shërbejnë jashtë vendbanimit apo krijojnë familje të reja. Pa e harruar që nga sot sistemimin përfundimtar të të gjitha familjeve të policëve të vrarë në krye të detyrës, fëmijët e të cilëve janë fëmijët tanë. Ndaj do të trajtojmë problemin e banimit për ata që shërbejnë në qytete të ndryshme nga qyteti ku kanë familjen dhe gjithashtu do të hapim rrugën e aplikimeve për vitin 2023, duke e nisur me 100 banesat e para, të cilat do t’u jepen familjeve të reja të punonjësve të policisë. Kriteret do të bëhen publike në ditët në vijim në bashkëpunim me Ministrinë e Financave dhe Ekonomisë”, deklaroi Balla.

LEXONI GJITHASHTU:

• Balla thirrje policisë: Mos u bashkoni “me të fortin e lagjes”, dilni kundër shtetit
• Balla takim me strukturat e Policisë në Vlorë: Të garantohet bregdet i sigurtë