Banesa në Durrës e boshatisur, 15-vjeçari Erion Boba do të varroset në Bulqizë

Banesa e familjes Boba në lagjen e ish-Kënetës qëndron e boshatisur, përveç pronarit të katit të parë, i cili ua kishte dhënë me qira tre vite më parë. Ata janë në Bulqizë, ku do të përcjellin në banesën e fundit djalin e tyre, 15-vjeçarin Erion Boba, i cili u godit me thikë nga një 14-vjeçar dhe humbi jetën pas 9 ditësh në spital, ngjarja e regjistruar më 25 nëntor pas mbarimit të orëve të shkollës.

Asnjë nga familjarët nuk është kthyer në banesën me qira, dhe banesa e gjyshërve nga ana e nënës është gjithashtu bosh. Paraprakisht, trupi i të miturit do të prehet në Bulqizë, vendbanimi i familjes para disa vitesh, e cila u shpërngul në Durrës për një jetë dhe shkollim më të mirë për tre fëmijët e saj, dy djem dhe një vajzë.

15-vjeçari Erion Boba, nxënës i Shkollës “Dom Nikollë Kaçorri”, u plagos më 25 nëntor në Durrës dhe dje pati fundin tragjik, kur humbi jetën teksa ndodhej në spital në Tiranë. Sot kryhet ceremonia e varrimit në vendlindjen e tij, në Bulqizë. Në lagjen ku familja Boba rrinte me qira, në zonën e ish-Kënetës, banorët shprehen me dhimbje për ngjarjen e rëndë.

Burimet policore thanë se sherri nisi nga një koment në rrjetet sociale dhe ofendimet e vazhdueshme në shkollë, të cilat më pas degraduan në plagosje me thikë. Dyshohet se 15-vjeçari Erion Boba e kishte marrë në telefon autorin 14-vjeçar me iniciale M.K., për të kërkuar sqarime, pasi kishte dëgjuar se ai e shante vazhdimisht në shkollë. Ata ranë dakord të takoheshin për t’u sqaruar, ku të pranishëm kanë qenë edhe shokë të tjerë të dy palëve, të cilët janë marrë në pyetje nga policia për ngjarjen e rëndë.

LEXONI GJITHASHTU:

• EMRI/ U plagos pak ditë më parë me thikë në Durrës, ndërron jetë 15-vjeçari
• Plagoset me thikë 15-vjeçari në Durrës, kapet autori i mitur