Plagoset me thikë 15-vjeçari në Durrës, kapet autori i mitur

Një ngjarje e rëndë është regjistruar në qytetin e Durrësit, ku një adoleshent 15-vjeçar ka mbetur i plagosur me thikë gjatë një konflikti për motive të dobëta. Policia ka bërë të ditur se autori i dyshuar është një 14-vjeçar, i cili pas disa orësh kërkimesh u kap dhe u vu në pranga.

Sipas informacioneve të policisë, ngjarja ndodhi më 25 nëntor 2025, në lagjen nr. 14/1, në rrugën “Lugina e Karavastasë”.

Hetimet paraprake treguan se i mituri M. K., 14 vjeç, dyshohet se goditi me thikë bashkëmoshatarin e tij, E. B., 15 vjeç, duke i shkaktuar plagë të rënda. I lënduari ndodhet në Spitalin Rajonal të Durrësit nën kujdesin e mjekëve.

Pas identifikimit të autorit, shërbimet e Policisë së Durrësit zhvilluan kontrolle në zona të ndryshme, duke bërë të mundur lokalizimin dhe arrestimin në flagrancë të 14-vjeçarit. Atij i janë sekuestruar edhe mjeti prerës që dyshohet se është përdorur në sulm.

I mituri akuzohet për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”. Materialet i janë referuar Prokurorisë së Durrësit për veprime të mëtejshme.

LEXONI GJITHASHTU:

• Plagosja në Bathore, autori: I shita makinën, po anashkalonte procedurat e pronësisë
• Aksidentohen dy makina pranë fshatit Drashovicë, plagosen shoferët