Barbara Doda: Ne jemi përgjegjës për rrjedhën që morën ngjarjet pas 8 dhjetorit

Barbara Doda, anëtare e Partisë Demokratike, tha në emisionin “Now” me Erla Mëhillin se çdo qytetar duhet të luftojë për demokracinë, pasi kjo e fundit nuk është e mirëqenë.

“Kur u shemb teatri u ndjeva shume e pavlerë dhe shumë e padobishme në këtë vend. I thashë tim ati (ish-student në protestën e 8 dhjetorit) që nuk keni bërë asgjë, sepse ja ku jemi tani. Ai më tha se brezi im mendon se ka lindur me të drejtën e demokracisë”, rrëfeu Barbara.

Ajo tha se patjetër që protesta studentore e 8 dhjetorit të vitit 1990 duhet të kujtohet dhe të festohet, mirëpo demokracia, sipas saj, nuk vjen me një datë.

Barbara Doda e sheh problemin jo te kujtesa historike e shqiptarëve, pasi ajo thotë që kjo nuk mungon, por te fakti që qytetarët nuk janë të vetëdijshëm për përgjegjësinë individuale që kanë për demokracinë.

“Ne jemi të vetëdijshëm për historinë e ndryshimit të regjimeve, ne jemi përgjegjës për ndryshimin e vendit dhe rrjedhës që mori vendi pas datës 8 dhjetor të vitit 1990”, u shpreh Doda.

Ajo theksoi se beteja për demokracinë nuk bëhet në një datë, por çdokush duhet të luftojë përditë, pavarësisht se kjo mund të kërkojë sakrifica.

LEXONI GJITHASHTU:

• Preç Zogaj: Nevojitet revolucion kulturor për të rrëzuar kultin e liderit
• Ish-dhjetoristi Blendi Gonxhe në NOW tregon çfarë ndodhi në 8 dhjetor ‘90