Barut në duar pas vrasjes së Ramazan Sinos, Gjykata lë në burg Valter Bamin

Valter Bami u arrestua për “armëmbajtje pa leje”. Në duart e tij u gjetën shenja baruti kur u bë atentati në fshatin Larushk ndaj Gentian Bejtjas, ngjarje ku mbeti i vrarë Ramazan Sino dhe u plagosën 2 fëmijë të mitur.

Gjykata e Apelit të Juridiksionit të Përgjithshëm e ka lënë në burg, pavarësisht se ky i fundit ka kërkuar lirinë dhe shpalljen e paligjshme të arrestimit.

Avokati i 37-vjeçarit, lir Murati ka bërë me dije se prokurorisë i është vënë në dispozicion edhe leja e armës sportive, me të cilën pretendon se klienti i tij bën qitje herë pas here.

Sipas avokatit, dyshimet ndaj klientit nuk qëndrojnë edhe për faktin se Valter Bami ka lidhje familjare me të ndjerin Ramazan Sino, dhe në kohën kur ka ndodhur atentati, klienti i tij ka qenë në banesë, gjë e cila vërtetohet nga pamjet e kamerave të sigurisë të ruajtura në telefonin e tij, që i janë vënë në dispozicion prokurorisë.

Pasi të gjendet arma sportive, pritet ekspertiza nëse baruti që rezulton në dorën e Valter Bamit ka dalë nga kjo armë.

LEXONI GJITHASHTU:

• Valter Bamit nuk i gjendet arma sportive, policia sërish kontrolle në Nikël
• Gjykata lë në burg Valter Bamin, avokati: Ishte me fëmijët kur ndodhi ngjarja