Basha me shqiptarët në Lombardi: Vota e diasporës s’është e pamundur, ja komploti…

Kryetari i PD, Lulzim Basha, ka zhvilluar një takim me bashkatdhetarët në Lombardi të Italisë. Ai tha se nuk ka asgjë të pamundur në mundësimin e votimit për diasporën, por këtë gjë e pengon kasta e vjetër politike.

Sipas tij është kjo “kastë politike” e cila ka thurur një komplot për ta mbajtur Shqipërinë kështu siç është.

“Nuk ka asgjë të pamundur për të realizuar votën e shqiptarëve jashtë Shqipërisë, për të realizuar votën tuaj këtu ku jetoni, në kushte të plota të integritetit dhe të lehtësisë për ta hedhur këtë votë.

Por ka një komplot të kastës së vjetër politike, ka një komplot të atyre që sot e gjithë ditën, e gjithë natën e shohin diasporën shqiptare, emigrantët shqiptarë me vlerat që ju përfaqësoni, me parimet tek të cilat besoni, sepse përmes këtyre parimeve të jeni të qartë përpara, në Itali, Greqi, në Amerikë, në Angli e kudo si një rrezik esencial për lojën e tyre të vjetër. Për ta mbajtur Shqipërinë kështu siç është, madje duke e plakur e duke e pakësuar ditë për ditë, për sa kohë mbahet nën kontrollin e duarve dhe mendjeve të vjetra politike.

Kjo është arsyeja pse më pak se një vit para të katërtave palë zgjedhje që kur premtoi votën e emigrantëve nga kjo sallë, ky kryeministër por jo vetëm ai i druhen zërit tuaj, i druhen vendimit tuaj, i druhen gjykimit tuaj, i druhen votës tuaj. Qëllimi është i qartë, t’ju bëjnë të hiqni dorë nga Shqipëria”,-tha Basha.

LEXONI GJITHASHTU:

• Lulzim Basha: Synojmë 71 deputetë në zgjedhjet e ardhshme. Sfida jonë është politike
• Basha: Do dorëzojmë në Kuvend dy amendamente për të mbështetur SPAK