Basha në Korçë: Biznesi i vogël do të ketë vetëm 1 taksë, 0.5% e xhiros vjetore

Kryetari i Partisë Demokratike, Lulzim Basha gjatë një takimit që ka pasur në Korçë me përfaqësues të biznesit u ka premtuar atyre uljen e taksave për biznesin e vogël.

Z. Basha tha se, me ardhjen e PD-së në qeveri do të vendoset një sistem taksash konkurruese për rajonin.

“Sa i përket biznesit të vogël, 140 milionë lekë e poshtë, do të kenë një taksë 0.5% e xhiros vjetore. Çdo taksë tjetër lokale apo qendrore çdo tatim tjetër, çdo lloj tjetër formë tarifimi do të zhduket. Do të ketë vetëm një taksë dhe asnjë tarifë dhe asnjë taksë tjetër”, deklaroi lideri i opozitës.

Një prej biznesmenëve që z. Basha takoi u shpreh se, vitin e fundit ka pasur rritje të taksave lokale për biznesin e vogël pasi nga 37 mijë lekë ka paguar 80 mijë lekë dhe kjo gjë po e çon drejt falimentimit.

Nga ana tjetër, për biznesin e madh, Basha tha se do të vendoset taksë e sheshtë prej 9%. “Pa këto masa, ekonomia shqiptare do të vazhdojë të hidhet drejt një gropë gjithmonë e më të thellë, siç është hedhur këto 7 vite”, tha Basha.

Gjatë takimeve në Korçë, Basha u shpreh më tej se, prioriteti kryesor i PD-së do të jetë ekonomia, punësimi dhe mirëqenia.