Basha: Rama lëviz me avion çarter, harxhon deri në 150 mijë euro karburant

Kreu i PD-së, Lulzim Basha akuzoi kryeministrin Edi Rama se po shfrytëzon postin për udhëtime nëpër botë me avion çarter, me të cilin së fundmi ka harxhuar deri në 150 mijë euro karburant.

“Para dy ditësh shkoi dhe erdhi diku me çarter dhe nuk njoftoi shqiptarët për çfarë po i harxhonte ato 120 apo 150  mijë euro karburant”, u shpreh Basha në Kuvend.

“Shkon e vjen me një avion luksoz në Paris, Mynih”, shtoi ai.

Menjëherë fjalën e mori ministrja Elisa Spiropali, e cila tha se Basha lexon të njëjtin fjalim në Kuvend dhe vetëm i ndryshon paragrafët.

“Basha të sqarojë pozicionin e tij brenda PD në raport me shqiptarët pastaj të kërkojë nga kjo shumicë dhe ky kuvend, llogari.  Nuk mund të vini këtu sa herë keni probleme të brendshme dhe të hidhni baltë këtu”, tha Spiropali.

Ajo theksoi se PD duhet të pranojnë humbjen e zgjedhjeve më 25 prill për shkak të paaftësisë së saj.