Pas dënimit nga Gjykata me 3 vite e 4 muaj burg për Saimir Tahirin, ka reaguar kreu i PD-së Basha ku thotë se dënimi vërteton akuzat e PD-së para disa vitesh.

Partia Demokratike i nisi akuzat mbi Tahirin që kur ky i fundit u emërua Ministër i Brendshëm i qeverisë së koalicionit PS-LSI në vitin 2013. Akuzat lidheshin me trafik droge, pjesëmarrje në grup kriminal të organizuar dhe pastrim parash.

Nga radhët e PD-së ka reaguar edhe Enkelejd Alibeaj, i cili thotë se dënimi i Tahirit provoi pretendimet e PD-së “se Rama dhe qeveria e tij janë të korruptuar”.

Gjykata e Posaçme e Apelit për Korrupsionin dhe Krimin e Organizuar dënoi sot me 5 vjet burg ish-ministrin e brendshëm Saimir Tahirin, i cili me gjykim të shkurtuar do të kalojë në burg 3 vite e 4 muaj. Tahirit i lejohet të bëjë rekurs në Gjykatën e Lartë, 45 ditë nga dhënia e këtij vendimi.

Më 20 shtator 2019, Gjykata e Krimeve të Rënda shpalli fajtor Tahirin për shpërdorim detyre duke e dënuar atë me 5 vite heqje lirie, dënim i pezulluar nga gjykata për t’u konvertuar në 3 vite shërbim prove.

Tahiri gjithashtu u akuzua për trafikim droge në bashkëpunim me grup të strukturuar kriminal, kryerje të veprave penale në kuadër të këtij grupi dhe pjesëmarrje në grup të strukturuar kriminal, por ato u rrëzuan nga gjykata.