Basha: “Taksimi Rama” uli fuqinë blerëse, FMN rekomandon taksë të sheshtë

Kryetari i Partisë Demokratike, Lulzim Basha thotë se, Fondi Monetar Ndërkombëtar i ka rekomanduar qeverisë shqiptare ndryshimin e kuadrit fiskal dhe zbatimin e një takse të sheshtë.

Sipas kreut të PD kjo shkon në një linjë me propozimin e opozitës e cila mbështet vendosjen e një takse të sheshtë prej 9%. Z. Basha thotë se, taksa progresive e vendosura nga qeveria “Rama” ka sjellë ulje të fuqisë blerëse.

“”Taksimi Rama” zbrazi xhepat e shqiptarëve, rriti çmimet, uli fuqinë blerëse, falimentoi bizneset dhe solli shkatërrimin e ekonomisë në çdo hallkë të saj. Raporti i FMN mbështet atë që PD do bëjë realitet: taksimin e thjeshtë dhe transparent”, shprehet lideri i PD.

“Taksa e sheshtë 9% dhe plani ynë ekonomik do të inkurajojë investimet e brendshme dhe të huaja, do të nxisë punësimin dhe do të rrisë fuqinë blerëse. Shqipëria në punë, mirëqenia për shumicën dhe jo një pakicë, do të jetë realitet i prekshëm për të gjithë’, përfundon Basha.