Bashkëshortja e kryebashkiakut Erion Veliaj paraqitet në Prokurorinë e Posaçme

Ajola Xoxa, bashkëshortja e kryetarit të Bashkisë së Tiranës, Erion Veliaj, është paraqitur pasditen e kësaj të hëne në ambientet e Prokurorisë së Posaçme kundër Korrupsionit dhe Krimit të Organizuar.

Sipas burimeve zyrtare, thirrja e saj në SPAK është bërë me kërkesë të prokurorit Ols Dado, për t’u marrë në pyetje si person në dijeni në kuadër të hetimeve të nisura nga organi i akuzës.

Kujtojmë se javën e shkuar Gjykata e Posaçme e Shkallës së Parë për Krime të Rënda rrëzoi kërkesën e Xoxës për kthimin e sendeve të sekuestruara gjatë kontrolleve të SPAK në banesën dhe biznesin e saj.

GJKKO rrëzoi gjithashtu dhe kërkesën e Arbër Veliajt, vëllait të kryebashkiakut, për kthimin e sendeve të sekuestruara nga SPAK.

Kontrollet u ushtruan dy javë më parë me urdhër të prokurorit Ols Dado, ku agjentët e BKH sekuestruan celularin e Ajola Xoxës, si dhe ushtruan kontrolle në qendrën “Harabel”, ku Xoxa është bashkëthemeluese.

Veprimet e organit të akuzë vijnë pas nisjes së hetimit pasuror për kryebashkiakun dhe familjarët e tij.

LEXONI GJITHASHTU:

• Reagon Veliaj: Jam i hapur ndaj drejtësisë, opozitarët të zhytur në llum
• Veliaj në SPAK/ Karamuço: Ja çfarë pritet tjetër nga hetimet