Reagon Veliaj: Jam i hapur ndaj drejtësisë, opozitarët të zhytur në llum

Agjentët e Byrosë Kombëtare të Hetimit u paraqitën këtë të premte në ambientet e banesës së kryebashkiakut të Tiranës dhe sekuestruan me vendim gjykate aparatin celular të bashkëshortes së tij Ajola Xoxa, në kuadër të hetimit pasuror të nisur nga SPAK.

Vetë kryebashkiaku i Tiranës Erion Veliaj duke marrë shkas nga kjo ka reaguar në platformën X duke u shprehur se është i hapur ndaj të gjithë insitucioneve të drejtësisë si ai dhe familjarët e tij por ndërkohë shkruan se përbuzën me neveri çdo të pavërtetë, që ka si qëllim dëmtimin e imazhit të tij apo familjarëve, që sipas tij bazohet në disinformacione edhe mbi vetë punën e këtyre institucioneve.

Veliaj thotë se opozitarët janë të zhytur në llumin e korrupsionit dhe ka disa të “ashtuquajtura media”, që luftojnë çdo zyrtar e funksionar publik që nuk bie pre e presioneve dhe shantazheve të tyre për përfitime të padrejta.

Reagimi i plotë i Erion Veliajt në X

“Duke marrë shkas nga zhvillimet e ditës së sotme, hapat procedurale të kryera nga prokuroria e posaçme në lidhje me hetimin pasuror që po kryhet ndaj meje dhe familjarëve të mi, jo vetëm janë të mirëpritura, por edhe i mbështes në çdo hap”.

U bë një kohë e gjatë që hetimin dhe gjykimin tim e bëjnë opozitarët e zhytur në llumin e korrupsionit dhe të “ashtuquajturat media”, që luftojnë çdo zyrtar e funksionar publik që nuk bie pre e presioneve dhe shantazheve të tyre për përfitime të padrejta”.

Familjarët e mi dhe unë, si qytetar i këtij vendi, por njëkohësisht edhe në cilësinë e kryetarit të Bashkisë së Tiranës, do të jemi gjithmonë të hapur për çdo veprim dhe vendim të institucioneve të drejtësisë, por duke përbuzur njëkohësisht me neveri çdo të pavërtetë, që ka si qëllim dëmtimin e imazhit tim dhe familjarëve të mi, si dhe duke përhapur, mbi të gjitha, disinformacione edhe mbi vetë punën e këtyre institucioneve”.

Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale. Të gjithë këta që i kanë borxhe drejtësisë, rrokin flamurin e përkrahjes së drejtësisë kur në përputhje me ligjin dhe vendimet e gjykatave kryhen veprime procedurale në kuadër të hetimeve, dhe e sulmojnë atë me çdo mjet tashmë që drejtësia ka filluar të veprojë mbi ta, duke thyer kështu tabunë shumë vjeçare të mosndëshkueshmërisë”.

LEXONI GJITHASHTU:

• BKH shkon në banesën e Veliajt, kryebashkiaku në vizitë zyrtare në Hamburg
• Agjentët e BKH në banesën e Erion Veliajt, reagon SPAK