Bashkitë dhanë 352 leje ndërtimi në pranverë, gjysmat u miratuan në Durrës

Bashkitë në vend kanë dhënë 352 leje ndërtimi gjatë 3 mujorit të dytë të vitit nga të cilat 156 janë miratuar vetëm në qarkun e Durrësit. Në krahasim me periudhën prill-qershor 2024, numri i lejeve është i njëjtë, por diferencën e bën sipërfaqja, e cila rezulton të jetë rreth 70% më e vogël.

Pra, nëse vitin e kaluar u miratua të ndërtohej në një sipërfaqe toke 845 mijë metër katror, këtë vit ndërtuesit do të shfrytzojnë hapësirë me sipërfaqe 280 mijë metër katror. Bie në sy se pjesa më e madhe e kërkesave lidhet me ndërtimin e banesave, me një ose 2 kate, 4 do të jenë rezidenca, 9 hotele dhe 21 ndërtesa tregtare.

Përveç Durrësit, hov ndërtimor do të ketë edhe Korça e Shkodra, të cilat shihen me potencial në aspektin e zhvillimit të turizmit për vitet në vazhdim.

Sipas INSTAT, që ka përpiluar raportin, vlera e përgjithshme e kostove të ndërtimit me lejet e autorizuara nga bashkitë këtë periudhë arrin 20 miliardë lekë.