Baton Haxhiu: Tentativa e Kim për të shkatërruar Berishën, e ktheu në hero

Për analistin, Baton Haxhiu reagimi i Departamentit Amerikan të Shtetit tregoi se qëndrimi i ambasadores amerikane në Tiranë për Berishën nuk është qëndrim personal.

Haxhiu tha se të gjitha raportet e SHBA ndërtohen nga stafi i ambasadës dhe çdo qëndrim verifikohet nga DASH dhe institucione të tjera.

“Nuk mund të themi që SHBA kanë një qëndrim personal ndaj dikujt. Deklarata e Berishës se Yuri Kim nuk përfaqëson qëndrimin e DASH kjo nuk ka kuptim”, tha Haxhiu.

Sipas tij është më e ndershme që të thuhet se nuk pajtohemi me këtë qëndrim të SHBA dhe jo të akuzosh ambasadoren.

Andi Bushati tha se Kim nuk bën politikat e saj në Shqipëri dhe qëndrimet janë të DASH. Por, Bushati shtoi se një ambasador ka shumë dorë se si e përpunon informacionin.

Sipas tij, Kim me sjelljen e saj ka dështuar që rolin e Berishës ta zvogëloi pas shpalljes ‘non grata’.

“Mendoj se debati real për Yuri Kim nuk është a zbaton direktivat e DASH. Sekretari Blinken ka dashur që ta shpallë Berishën ‘non grata’ dhe detyra për ta nxjerr nga politika ka qenë e Kim. Ne kemi parë që mënyrë se si e ka zbatuar urdhrin ka dështuar”, tha Bushati.

Edhe Baton Haxhiu shprehu mendimin se është tepruar për shkatërrimin e Berishës në një kohë kur ishte i parëndësishëm.

Sipas tij, mënyra s’i u tentua që të largohej Berisha nga politika, e ktheu atë në hero.

“Mendoj se mënyra se si është larguar Sali Berisha është heroizim i tij”, tha Haxhiu.