BDI pritet të tërheqë ministrat nga qeveria, kushti që duhet të plotësojë opozita

Zyrtarët e Bashkimit Demokratik për Integrim në Maqedoninë e Veriut do të largohen nga qeveria, pasi Kuvendi të miratojë ndryshimet Kushtetuese.

Kryetari i BDI-së Ali Ahmeti përmes një statusi në facebook i drejtoi një letër publike kryeministrit Dimitar Kovaçevski, duke thënë se ministrat dhe funksionarët e BDI-së do të japin dorëheqje,pasi të votohen ndryshimet kushtetuese.

Në reagimin e tij, ai ka thënë se vendimi për dorëheqje është marrë “duke u nisur nga kushtëzimi i opozitës, VMRO DPMNE-së, se do t’i votonte ndryshimet kushtetuese nëse Bashkimi Demokratik për Integrim del nga Qeveria”.

“Duke qenë se Bashkimi Demokratik për Integrim dhe unë, mbetemi të përkushtuar në përcaktimin se integrimi euroatlantik, me të drejta të plota të shtetit, përpos se në NATO, edhe në Bashkimin Evropian, si dhe aleanca e pashkëputur me Shtetet e Bashkuara të Amerikës, kanë qenë, janë dhe mbeten interesi më madhor i të gjithë qytetarëve tanë ministrat dhe funksionarët qeveritarë nga radhët e BDI japin dorëheqje nga postet që aktualisht janë duke i ushtruar! Dorëheqjet, materializohen në momentin kur opozita të votojë ndryshimet kushtetuese”, shkruan Ahmeti.

Përmes një komunikate për media, VMRO DPMNE- e ka përshëndetur njoftimin e bërë nga kryetari i BDI-së, por ka thënë se kërkon që dorëheqjet të jenë të parevokueshme dhe menjëherë të organizohen zgjedhje të parakohshme parlamentare.

LEXONI GJITHASHTU:

• Me urdhër të Speciales, arrestohet në Tiranë ish-luftëtari i UÇK-së Dritan Goxhaj
• OBSH ngre alarmin për klimën, 60 000 jetë të humbura nga nxehtësia ekstreme në 2022