BE heq bankën më të madhe ruse nga sistemi SWIFT; Përse është e rëndësishme?

Banka më e madhe e Rusisë do të përjashtohet nga sistemi i pagesave SWIFT, njoftoi të mërkurën presidentja e Komisionit Europian Ursula von der Leyen.

Sberbank është në mesin e tri bankave ruse që do të sanksionohen si pjesë e paketës së gjashtë të masave ndëshkuese të ndërmarra nga Bashkimi Europian kundrejt Rusisë.

Qeveria e Ukrainës ka kërkuar përjashtimin e plotë të Rusisë nga sistemi ndërkombëtar bankar.

“Nuk do të tregohem diplomatik mbi këtë çështje. Cilido që ka dyshime nëse Rusia duhet të përjashtohet nga SWIFT-i apo jo, duhet të kuptojë që gjaku i pafajshëm i burrave, grave dhe fëmijëve ukrainas do të jetë në duart e tyre”, shkroi në Twitter një ditë pas fillimit së pushtimit rus, Ministri i Jashtëm i Ukrainës, Dmitri Kuleba.

I will not be diplomatic on this. Everyone who now doubts whether Russia should be banned from SWIFT has to understand that the blood of innocent Ukrainian men, women and children will be on their hands too. BAN RUSSIA FROM SWIFT.

— Dmytro Kuleba (@DmytroKuleba) February 24, 2022

Por çfarë është SWIFT-i dhe çfarë ndodh kur një banke i hiqet qasja nga ky sistem?

SWIFT, shkurtimi i togfjalëshit “Shoqëria për Telekomunikacionin Financiar Ndër-bankar Botëror”, është një sistem i sigurt mesazhesh i cili thjeshtëson pagesat e shpejta ndërkufitare.

SWIFT-i është një sistem tejet i besuar dhe i sigurt i cili lejon bankat të përpunojnë vëllime të mëdha transaksionesh në një hark kohor shumë të shkurtër.

Sistemi me seli kryesore në Belgjikë përdorët nga mbi 11,000 institucione financiare në më shumë se 200 shtete të botës, për t’i dërguar apo transferuar para dhe informacion njëra-tjetrës.

Përse ka rëndësi përjashtimi nga sistemi SWIFT?

Përjashtimi i bankave ruse e bën shumë më të vështirë qasjen në tregjet financiare anë e mbanë botës.

E si për rrjedhojë, kjo e vështirëson shumë – për të mos thënë e bën të pamundur – për biznesmenët rusë me llogari në këto banka që të importojnë apo eksportojnë mallra, si dhe të huazojnë e investojnë jashtë Rusisë.

LEXONI GJITHASHTU:

• Çfarë është sistemi SWIFT – dhe pse SHBA po heziton ta përdorë kundër Rusisë?
• ‘Një tërmet më i madh se SWIFT’ – sanksionet e PayPal, Visa dhe Mastercard