BE kërkon të përfshihet në planin SHBA-Rusi për paqen në Ukrainë

Bashkimi Evropian ka kërkuar të jetë pjesë e çdo negociate mbi një plan 28-pikësh të hartuar nga SHBA-të dhe Rusia për të dhënë fund luftës në Ukrainë, duke theksuar se çdo përpjekje diplomatike duhet të përfshijë Kievin dhe udhëheqësit evropianë.

Plani, i raportuar për herë të parë nga media amerikane Axios, përmban kushte të cilat do të ishin shumë të pafavorshme për Ukrainën, përfshirë dorëzimin e plotë të Donbasit dhe kufizime mbi forcat e armatosura të vendit.

Zbulimet dolën përpara takimit të ministrave të punëve të jashtme të BE-së në Bruksel, ku lufta e agresionit rus dominoi axhendën. Përfaqësuesja e Lartë për Punët e Jashtme, Kaja Kallas, deklaroi se Evropa mbështet një paqe afatgjatë dhe të drejtë dhe se çdo plan duhet të përfshijë ukrainas dhe evropianë për të pasur efekt.

Ajo shtoi gjithashtu se Rusia nuk ka bërë asnjë lëshim, duke vijuar bombardimet dhe vrasjet e civilëve, dhe se zgjidhja e konfliktit nuk mund të arrihet pa ndërprerjen e agresionit nga Moska.

LEXONI GJITHASHTU:

• Shiste mallra të vjedhura në Greqi, arrestohet 49 vjeçarja në Yzberisht
• I dërguari i Trump për Ukrainën, Kellogg, do të largohet nga posti