Krasniqi për krerët e UÇK: Mund t’i burgosësh, por s’mund t’ua mohosh prezencën

Kryetari i Partisë Demokratike të Kosovës, Memli Krasniqi, ka përkujtuar një-vjetoron e ‘Marshit të Drejtësisë, të mbajtur në Prishtinë, ku mijëra qytetarë dolën në mbështetje të krerëve të UÇK-së që mbahën në Hagë.

Përmes një postimi në Facebook, Krasniqi ka shkruar se disa figura të historisë mund edhe t’i burgosësh por nuk mund t’ua mohosh prezencën.

“Janë disa personalitete, të rralla gjatë historisë, emri dhe veprimtaria e të cilëve e tejkalon të zakonshmen. Të tillët, mund edhe t’i burgosësh, por s’mund t’ua mohosh prezencën. Të tillë janë edhe Hashim Thaçi, Kadri Veseli, Jakup Krasniqi e Rexhep Selimi”, ka shkruar Krasniqi.

Ai tha se përgjithë këtyre viteve ish-krerët e UÇK-së kanë qenë më shumë të popullit, sesa të familjeve të tyre.

“Në 54, 55, 71 dhe 51 vitet e tyre të deritashme, Hashim Thaçi, Kadri Veseli, Jakup Krasniqi e Rexhep Selimi, më së paku u kanë takuar vetes dhe familjes. Rruga e tyre deri te liria, me fatin e një populli mbi supe, ka kaluar nëpër luginën e vdekjes më tepër se gjysmën e jetës së tyre”, ka vijuar ai.

Ai ka thënë gjithashtu se është detyrë e tyre që derisa të kthehen në Kosovë, të vazhdojnë misionin e tyre për shtet-ndërtim.

“Sot, është obligim i ynë që, deri kur t’i kemi përsëri fizikisht në mesin tonë, ta vazhdojmë ëndrrën dhe punën për shtetndërtim, fuqizim dhe integrim. Ky është respekti dhe nderimi më i madh që mund t’u bëjmë emrave të tyre, sakrificës së tyre, familjeve të tyre. Këtë ua thash edhe familjarëve të tyre të respektuar gjatë vizitave të sotme te ta”, ka shkruar kryetari i PDK-së.

LEXONI GJITHASHTU:

• Ish-luftëtari i UÇK: Populli shqiptar do mbrojë Kosovën, jo politika
• Ish-Komandanti i UÇK paraqitet në zyrat e EULEX në Kosovë