BE-Serbisë: Respektoni vendimin për sanksione

Bashkimi Evropian pret që Beogradi zyrtar të respektojë vendimet në lidhje me vendosjen e sanksioneve ndaj Rusisë për shkak të luftës në Ukrainë, u tha sot në Bruksel.

“Ne presim që të gjitha vendet që duan marrëdhënie më të ngushta me BE-në të jenë në përputhje me politikën tonë të sanksioneve”, tha zëdhënësi kryesor i Komisionit Evropian, Eric Mammer.

Ana Pisonero, zëdhënësja e Komisionit Evropian për zgjerim, kujtoi: “Vendet kandidate, si Serbia, pritet të respektojnë vendimin dhe pozicionimin e BE-së për çështjet e politikës së jashtme dhe të sigurisë”.

Më 22 shkurt, kur Bashkimi Evropian vendosi paketën e parë të sanksioneve ndaj Rusisë, tha se pret që Serbia t’i përgjigjet pozitivisht kërkesës për harmonizim me politikën e jashtme të BE-së.

Pas seancës së Këshillit të Sigurisë Kombëtare të Serbisë më 25 shkurt, presidenti Vuçiç deklaroi se Serbia e konsideron të gabuar shkeljen e integritetit territorial të çdo vendi, përfshirë Ukrainën, por se nuk do të vendosë sanksione ndaj Rusisë.

• Vuçiç reagon ndaj kërkesës së Kosovës për anëtarësim në NATO

Serbia është i vetmi vend në rajon që nuk e ka harmonizuar politikën e saj të jashtme me politikën e BE-së ndaj Rusisë, duke mos vendosur sanksione ndaj Rusisë.

Rusia ka nisur pushtimin e Ukrainës në orët e para të 24 shkurtit. Shtetet perëndimore kanë dënuar veprimet e Rusisë dhe kanë vendosur sanksione ndaj Moskës.

Nga vendet e rajonit Shqipëria, Kosova, Mali i Zi, Maqedonia e Veriut dhe Kroacia kanë dënuar sulmin rus ndaj Ukrainës.

Shqipëria i është bashkuar Shteteve të Bashkuara dhe Bashkimit Evropian, duke vendosur sanksione ndaj Rusisë.

LEXONI GJITHASHTU: 

• Përditësime LIVE 28 shkurt: Nisin bisedimet e paqes Rusi-Ukrainë