Begaj uron Bajramin: Besimi të jetë shtysë për ne për vepra të mira

Presidenti i Republikës Bajram Begaj, ka uruar nga Kavaja besimtarët myslimanë për festën e Fitër Bajramit.

Gjatë një vizite në Xhaminë Kubelie, Begaj uroi që lutjet dhe sakrifica e besimtarëve gjatë muajit të Ramazanit të jenë të pranuar.

Ai shtoi se sakrifica dhe besimi të jenë shtysë për të bërë vepra të mira për çdo shqiptar.

“Uroj nga zemra që agjërimi i muajit të Ramazanit ka përmbushur qëllimin e shprehjes së devocionit të besimtarëve përmes sakrificës! Sakrifica në emër të besimit shpresoj të jetë shtysë për ne, për të bërë vepra të mira, për familjen, për shoqërinë dhe për kombin.

Në fakt, kjo festë e Fiter Bajramit ka karakteristikë të veçantë solidaritetin dhe dashurinë. Dashurinë për njëri-tjetrin, dashurinë për Zotin. Sot në Kavajë gjeta veten, takova miq të rinj dhe të vjetër, të besimeve të ndryshme dhe ku më mirë se Kavaja tregohet kjo harmoni fetare.

Bashkëjetesa dhe harmonia fetare për të gjithë kombin tonë është një vlerë e jashtëzakonshme, vlerë e cila duhet ruajtur, duhet promovuar dhe pse jo duhet eksportuar. Të eksportojmë atë vlerë që është më e mira. Populli shqiptar e ka treguar me vepra që e përkrah të ndryshmen.

Kemi pritur refugjatë afganë, kemi pritur refugjatë ukrainas, kemi hapur dyert tona në ditë të vështira, pse jo edhe në këtë ditë të bëjmë një thirrje që të ndihmojmë ata që janë më të pamundurit, ata që kanë nevojë për më shumë. Gëzuar Festën e Fiter Bajramit! Uroj për të gjithë shqiptarët, mirësi në jetën e tyre!”, tha Begaj.

LEXO GJITHASHTU:

• “Kjo ditë të sjellë mbarësi”- Alibeaj e Bejko urojnë Fitër Bajramin
• Meta uron Fitër Bajramin: Le të rritet shpresa për një të ardhme më të mirë
• Mijëra besimtarë myslimanë falin Namazin në sheshin Skënderbej