“Bëj çfarë të duash”, Irani: Nuk do negociojmë me Trump ndërkohë që kërcënohemi

Presidenti Masoud Pezeshkian tha të martën se Irani nuk do të negociojë me SHBA-në ndërkohë që kërcënohet, duke i thënë Presidentit Donald Trump “bëj çfarëdo që të duash,” sipas raporteve të medias shtetërore iraniane.

“Për ne është e papranueshme që ata (SHBA) të japin urdhra dhe të bëjnë kërcënime. Unë nuk do të negocioj as me ju. Bëj çfarëdo që të duash,” citohej të thoshte Pezeshkian nga media shtetërore.

Lideri i Lartë i Iranit, Ayatollah Ali Khamenei, tha të shtunën se Teherani nuk do të përfshihet në negociata nën presion, një ditë pasi Trump tha se kishte dërguar një letër që e nxiste Iranin të angazhohej në bisedime për një marrëveshje të re bërthamore.

Ndërsa shprehte gatishmëri për një marrëveshje me Teheranin, Trump ka rivendosur fushatën e “presionit maksimal” që ai e përdori gjatë mandatit të tij të parë për të izoluara Iranin nga ekonomia globale dhe për të ulur eksportet e tij të naftës deri në zero.

Në një intervistë për Fox Business, Trump tha javën e kaluar: “Ka dy mënyra për të trajtuar Iranin: ushtarakisht, ose bëni një marrëveshje” për të parandaluar që Teherani të fitojë armë bërthamore.

Irani ka mohuar prej kohësh dëshirën për të zhvilluar armë bërthamore. Megjithatë, ai ka përshpejtuar ndjeshëm pasurimin e uraniumit deri në 60% pastërti, afër nivelit 90% që është i nevojshëm për armë bërthamore, ka paralajmëruar Agjencia Ndërkombëtare e Energjisë Atomike (IAEA).

Irani ka përshpejtuar punën e tij bërthamore që nga viti 2019, një vit pasi Presidenti Trump hodhi poshtë marrëveshjen bërthamore të Teheranit të vitit 2015 me gjashtë fuqitë botërore dhe rivendosi sanksione që kanë dëmtuar rëndë ekonominë e vendit.

LEXONI GJITHASHTU:

• Netanyahu: Puna kundër Iranit përfundon me mbështetjen e Trump
• Lideri Suprem i Iranit refuzon bisedimet bërthamore me Trump: Nuk zgjidhin gjë