Bëri komente raciste, reperit të famshëm Kanye West i ndalohet hyrja në Britani! Festivali Wireless anulohet

Festivali Wireless është anuluar pasi këngëtari kryesor Kanye West u pengua të shkonte në Mbretërinë e Bashkuar.

Qeveria refuzoi lejen që West të udhëtonte për në Mbretërinë e Bashkuar pas një reagimi negativ ndaj performancës së tij të planifikuar në festivalin e Londrës këtë verë.

Gjatë disa viteve të fundit, West ka shkaktuar zemërim për një sërë komentesh antisemite, raciste dhe pro-naziste.

Ministria e Brendshme i tha BBC-së se reperi bëri një kërkesë për të udhëtuar në Mbretërinë e Bashkuar të hënën nëpërmjet një Autorizimi Elektronik Udhëtimi (ETA). Thuhej se vendimi për të refuzuar lejen u mor me arsyetimin se prania e tij nuk do të ishte e favorshme për të mirën publike.

“Qeveria ka marrë qartësisht vendimin e duhur. Për herë të parë, kur tha se antisemitizmi nuk ka vend në Mbretërinë e Bashkuar, i mbështeti fjalët e saj me veprime. Dikush që është mburrur se ka fituar dhjetëra miliona dollarë nga shitja e bluzave me svastikë dhe që publikoi një këngë të quajtur Heil Hitler vetëm disa muaj më parë, padyshim që nuk do të ishte në favor të së mirës publike në Mbretërinë e Bashkuar. Festivali Wireless, në kërkimin e tij të dëshpëruar për fitim, e mbrojti ftesën deri në fund. Kjo është e turpshme dhe sponsorët e tij duhet të vazhdojnë të qëndrojnë larg”, tha një zëdhënës i Fushatës Kundër Antisemitizmit.

West tha të martën se “do të ishte mirënjohës” të takohej me anëtarë të komunitetit hebraik në Mbretërinë e Bashkuar pas polemikave rreth rezervimit të tij.

Në një deklaratë, reperi, i njohur tani si Ye, tha se kishte qenë “duke ndjekur bisedën rreth Wireless” dhe ofroi të takohej personalisht me përfaqësues të komunitetit “për të dëgjuar”.

“E di që fjalët nuk janë të mjaftueshme. Do të duhet të tregoj ndryshim përmes veprimeve të mia. Nëse jeni të hapur, unë jam këtu”, tha ylli, i cili ka një histori të komenteve antisemite.

Kryeministri Sir Keir Starmer e kritikoi më parë rezervimin e West, duke komentuar gjatë fundjavës se antisemitizmi në çdo formë është i neveritshëm dhe duhet të përballet me vendosmëri kudo që shfaqet.

Sekretari i Shëndetësisë Wes Streeting i bëri jehonë këtyre deklaratve të martën, duke e quajtur faljen e West “të pakuptimtë dhe egoiste” dhe duke akuzuar Wireless se i ka ofruar reperit një besueshmëri më të lartë seç duhet.

“Nëse ai dëshiron falje, nuk është falja ime ajo që i duhet. Është falja e komuniteteve hebraike dhe nuk mendoj se ai ka bërë asgjë për ta merituar atë”, tha Streeting.