Berisha: Demokratët nuk shantazhohen nga Yuri Kim-i

Kryetari i Partisë Demokratike, Sali Berisha deklaroi se demokratët nuk mund të shantazhohen nga diplomatë që u tregojnë barin me formulat staliniste të idh-diktarorit Enver Hoxha, duke iu referuar ambasadores amerikane, Yuri Kim.

Në një deklaratë për mediat nga selia blu, Berisha u shpreh se demokratët dhe shqiptarët, e kanë kuptuar se Amerika është vendi i vlerave dhe lirive, por nënvizoi se Kim ka problemet e saj me mafien e Geroge Soros-it.

“Në fakt, asgjë nuk i pengoi demokratët që të zgjedhin udhëheqjen e tyre. Asgjë nuk mashtroi dot demokratët, asnjë kërcënim nga askush nuk i bindi ata që tërhiqen nga rruga e rithemelimit të një opozite të vërtetë. Demokratët, e them këtu me siguri të plotë, janë dhe mbeten njerëz të idealeve demokratike dhe pro-perëndimore. Por ata kurrë nuk mund të shantazhohen, aq më tepër nga persona që u tregojnë barin me formulat staliniste të Enver Hoxhës. Aq më tepër nga diplomatë që kanë dëmtuar shumë rëndë me qëndrimet e tyre, reputacionin e vendit të tyre te shqiptarët. Me këtë rast, demokratët dhe shqiptarët kanë kuptuar se Amerika është vendi i vlerave, parimeve dhe lirisë, por ka edhe ajo problemin e saj me mafien e George Soros, e cila nuk njeh parime, nuk njeh vlera dhe as interesa amerikane.

Kjo mafie, siç është një rrezik i vërtetë për demokracinë shqiptare, fatmirësisht sot, del gjithnjë e më e qartë se është një rrezik për demokracinë amerikane. Nuk kam ndërmend të komentoj më gjatë për një njeri, që ka dëmtuar me qëndrimet e saj, reputacionin e vendit të vet në Shqipëri. Dhe, për ta mbyllur, një njeri që u bë protagoniste kryesore e asaj që quhet ‘woke culture’. Kjo është kultura që neverisin më së shumti shqiptarët se çdo kulturë tjetër. E neverisin sepse kanë vuajtur më shumë se të tjerët. 45 vite kanë qenë falsifikim dhe mashtrim i historisë. Kështu që shqiptarët e kapin në ajër, tendencën më të vogël të mashtrimit dhe falsifikimit. Mbyllni sytë dhe kujtoni se çfarë u bë në 100-vjetorin e marrëdhënieve mes vendeve tona, se si u përdor teknika e amputimit për t’i mbyllur ato në vitin 1991”, theksoi kryedemokrati.

LEXONI GJITHASHTU

• Berisha: 51 mln euro pagesa nga qytetarët e Tiranës për kontot e Ramës dhe Veliajt
• Kryemadhi: Të ndalen pagesat ndaj inceneratorit të Tiranës
• SKEMA e abuzimeve për inceneratorin e Fierit, roli i Alqi Bllakos