Berisha: Dialogu që kërkon Rama është burgosja e opozitës

Për të kërkuar drejtësi dhe rikthimin e rendit në kryeqendrën e veriut, Partia Demokratike do të organizojë një protestë solidarizuese në qytetin e Shkodrës ditën e shtunë.

Në konferencën me gazetarët, Sali Berisha pas ngushëllimeve për familjarët e tre viktimave të masakrës në Shkodër theksoi se protesta do të jetë me mesazhin që qytetarët nuk mposhten përballë krimit.

“Në shenjë solidariteti me qytetarët e Shkodrës, ftoj të gjithë opozitarët kudo që janë, të shtunën në ora 12:00 në Shkodër, solidaritet me qytetarët e këtij vendi, me këtë qytetar të bekuar, si dëshmi që nuk do të pranojmë kurrë që krimi të mposhtë Shkodrën dhe shkodranët. Në këtë protestë, mosbindje civile, ne i themi jo, dhunës së mafias së Edi Ramës”, u shpreh kreu i PD.

Gjatë kësaj dalje për mediet, Berisha komentoi edhe ftesën e kryetares së Kuvendit për rikthim në dialog të opozitës, duke theksuar me burgosjen e liderëve të opozitës, Rama tregon se ka tjetër vullnet.

“Ata që mendojnë se mund të kalojnë mbi këto akte, nuk bëjnë gjë tjetër, veç se përligjin një diktaturë dhe ne jemi thjeshtë në qëndresën tonë.  Pra se çfarë dialogu kërkon Edi Rama, besoj se e demonstron qartë me burgosjen e drejtuesve kryesore të opozitës. Ajo që ndjej keqardhje, ambasadori ishte i ftuar sot dhe nuk mund të mos e them, të dorëzojë raportin e Komisionit Europian ditën kur parlamenti ishte në seancë plenare. I rikujtoj zotërisë së nderuar, se kjo kurrë nuk ka ndodhur. Raportet janë paraqitur në selinë e parlamentit, por këtë kurth e organizoi zonja Spiropali”, tha Berisha.

LEXONI GJITHASHTU:

• Berisha reagon pas protestës: Kemi ezauruar 2 nga 77 mënyrat e mosbindjes civile
• Berisha thirrje Bashkimit Europian: Hiqni dorë nga kjo drejtësi e kriminalizuar