Ish-kryeministri Sali Berisha ka deklaruar se Shqipëria duhet të shfrytëzojë në maksimum potencialin e gazsjellësit TAP, duke e konsideruar një “mëkat” dhe “të pafalshme” mospërdorimin e tij për zhvillimin energjetik të vendit.

Gjatë një deklarate publike, Berisha theksoi se gazifikimi i qyteteve do të jetë një nga prioritetet kryesore të qeverisë së ardhshme, duke nënvizuar rëndësinë e ndërtimit të termocentraleve me gaz, të cilat do të përmbushin standardet më të larta mjedisore.

“Kontratat ekzistuese me TAP-in i mundësojnë Shqipërisë të ndërtojë mbi 500 megavat termocentrale me gaz. Energjia do të jetë një nga shtyllat kryesore të programit tonë dhe do të ndryshojë jetën e qytetarëve shqiptarë,” tha Berisha.

Ai gjithashtu kritikoi politikat aktuale të energjisë, duke argumentuar se Shqipëria, me një nga gazsjellësit më të fuqishëm të kontinentit që kalon nëpër territorin e saj, nuk duhet të mbështetet tek importi i gazit të lëngshëm, por të shfrytëzojë resurset e veta natyrore.

“Ëndrra shqiptare në fushën e energjisë do të bëhet realitet. Pasuritë e jashtëzakonshme natyrore që ka vendi ynë do të kthehen në mirëqenie dhe begati për qytetarët shqiptarë,” përfundoi ai.

Berisha kujtoi se gjatë qeverisjes së tij, në periudhën 2009-2013, u firmosën kontrata për ndërtimin e 434 hidrocentraleve në Shqipëri, përfshirë Kaskadën e Devollit, një nga projektet më të mëdha hidroenergjetike në Europë në atë kohë.

“Në vitet 2009-2013, u firmosën kontratat për ndërtimin e 434 hidrocentraleve në Shqipëri, dhe u inauguruan punimet për dhjetëra prej tyre, ndër të cilës Kaskada e Devollit, që në kohën kur ndërtohej ishte hidrocentrali më i madh në Europë dhe ndërtohej nga kompania numër një në botë për ndërtimin e hidrocentraleve, Statkraft”, tha Berisha.

Sipas tij, Shqipëria ka potencialin të bëhet një superfuqi energjetike në rajon, me investime të rëndësishme në gazifikimin dhe infrastrukturën energjetike të vendit.

LEXONI GJITHASHTU:

• Mbyllja e Tik-Tok për një vit, Berisha njofton protestë kombëtare
• Qeveria miraton vendimin, mbyllet për 1 vit TikTok në Shqipëri