Berisha kërkon të destabilizojë Shqipërinë, thotë analisti Haxhiu

Analisti Baton Haxhiu thotë se ish-kryeministri Sali Berisha kërkon të destabilizojë Shqipërinë.

Në emisionin “Shock” në “Euronews Albania”, Haxhiu u shpreh se Berisha kërkon të krijojë një krizë të madhe në skenën politike. Sipas tij, Berisha do të ketë negociata me presidentin Ilir Meta për të rrëzuar kryeministrin Edi Rama.

“Ai kërkon një betejë duke qenë në krye dhe duke e krijuar krizën e madhe. Berisha është i vetëdijshëm se kriza e madhe bëhet ose ndërtohet vetëm nëse ai bëhet kryetar i PD dhe Ilir Meta kryetar i Partisë Socialiste. Berisha e do fuqinë kundër Ramës dhe do të ketë negociata me Metën për t’ia nxirë jetën pushtetit”, tha ai.

Ndërsa, analisti Andi Bushati shprehet se Berisha është i detyruar të sillet si kryetar i Partisë Demokratike, edhe pse ende nuk janë zhvilluar zgjedhjet në parti.

Sipas Bushatit, Berisha nuk përballet vetëm me kryeministrin Rama, por edhe me SHBA-të dhe grupin kundërshtar brenda PD-së.

“Berisha është i dënuar të sillet në këtë mënyrë. Ka njerëz që e kontestojnë në parti por nuk janë sfidantë normal. Ata janë si një koalicion, kundërshtarë të mbështetur nga amerikanët dhe pushteti”, tha Bushati.

LEXONI GJITHASHTU

• Haxhiu: Berisha duhet t’i provojë zgjedhjet e ardhshme lokale