Berisha: Konsultimet e PS për Presidentin janë farsë

Ish-kryeministri Sali Berisha thotë se procesi i konsultimeve për zgjedhjen e presidentit të ri nuk është transparent.

Ai e cilësoi ‘farsë’ sjelljen e kryeministrit Rama me vetë grupin e PS duke shtuar se të njëjtën gjë po tenton të bëjë me opozitën.

“Dini gjë cilin kandidat kanë propozuar deputetët e PS? A ta mund të kenë propozuar 40 emra, por ai (Rama) do të zgjedhë atë që do, ndaj procesi ishte sekret”, tha ai.

Berisha ‘pranoi’ se mazhoranca i ka votat për ta zgjedhur presidentin, por me këtë sjellje tha ai, ‘Rama po poshtëron grupin e PS dhe shoqërinë civile’.

Ai tha se opozita nuk duhet të propozojë emra për president në një kohë kur nuk i ka votat.

“Ka ide por sa racionale është? Mund të propozosh kur ke votat por kur nuk i ke është të tallesh me veten”, tha Berisha.

Për debatin brenda PD, Berisha tha se nuk e njeh Alibeajn si kryetar të grupit parlamentar.

“Do të mblidhet Kongresi do të zgjedhë Këshillin Kombëtar, do të zgjedhë nënkryetarin. Unë nuk e njoh atë (Alibeajn)”, tha Berisha.

Gjithashtu ish-kryeministri deklaroi se nuk i njeh vendimet e kaluara për përjashtimet nga PD dhe pjesëmarrja e tij në mbledhje tha ai, e dëshmon këtë.