Berisha: Opozita do të hapë platformën parlamentare para Kryeministrisë, detajet

Gjatë një konference për shtyp këtë të premte, kreu i PD, Sali Berisha, paralajmëroi se opozita do të hapë platformën parlamentare para Kryeministrisë, ku do të flasin deputetët dhe qytetarët.

Ai thotë se qeveria ka kaluar në ekstrem në zhvillimin e seancave parlamentare, ku sipas tij, nga 9 seanca të zhvilluara, opozita është lejuar të diskutojë vetëm në një seancë.

“Kjo do të thotë de facto asgjësim i parlamentit dhe parlamentarizmit, do të thotë shkelje e Kushtetutës, rregullores së parlamentit, rendit kushtetues të vendit. Do të thotë mohim i të drejtave të opozitës”, tha Berisha.

Në këto kushte, ai i sugjeroi grupit parlamentar dhe partisë që opozita të hapë platformën parlamentare para ndërtesës së Këshillit të Ministrave, dhe aty deputetët e opozitës dhe qytetarët të paraqesin në fjalimet e tyre të gjitha mendimet, propozimet dhe denoncimet.

Berisha thotë se edhe pse plasin shumë skandale, jo vetëm kryeministri, por as ministrat nuk paraqiten në interpelanca në parlament, prandaj, thotë ai, do të kalojë në debatin me qytetarët.

Sipas Berishës, kjo përbën një hap të domosdoshëm për t’iu përgjigjur asaj që ai e quajti represioni ndaj opozitës në parlament.