Berisha për zgjedhjet në Kosovë: Model demokracie, mesazh për Shqipërinë

Kreu i Partisë Demokratike, Sali Berisha, vlerësoi zgjedhjet në Kosovë si një model të qeverisjes demokratike.

Ai ka theksuar se sipas një institucioni prestigjioz, qeverisja e Kosovës është trefish më afër standardeve evropiane sesa ajo e Shqipërisë.

Më tej, kreu i PD nënvizoi se ky është një tregues domethënës, duke pasur parasysh që Kosova ka vetëm 17-18 vite pavarësi, ndërsa Shqipëria mbi 100 vjet.

Edhe njëherë, dhe shumë herë, duhet të urojmë Kosovën për zgjedhjet model që ka zhvilluar. Ndaj dhe në vlerësimin që bënte një institut shumë prestigjioz, qeverisja e Kosovës dilte 3 herë më afër qeverisjes demokratike evropiane se sa Shqipëria. 3 herë më afër.

Qeverisja e një vendi që ka 17-18 vite pavarësi, krahasuar me një vend që ka 100 e ca vite pavarësi. Ishte tregues jashtëzakonisht domethënës. Qytetarët e Kosovës votuan të lirë.
Zgjodhën kryetarët që deshën, pati komuna në të cilat fituan krejtësisht të pavarur vetëm me emrin dhe personalitetin e tyre, në rivalitet më partitë e mëdha.

Dhe gjithçka u zhvillua në standardet e ligjit, e kundërta e asaj që ndodh me zgjedhjet në Shqipëri, ku narkoshteti dikton çdo gjë.
Ku bëhen përpjekje titanike për të legjitimuar farsën elektorale dhe që është përgjegjësia jonë më madhore për t’u ngritur dhe luftuar kundër saj.

Mesazhi i Kosovës është një kushtrim për ne.
Unë dua t’i përgëzoj edhe njëherë me gjithë zemër, edhe në emër tuaj dhe në emër të të gjithë atyre që përfaqësojmë, për këtë sukses, i cili është një kushtrim për të gjithë shqiptarët.

Berisha përfundoi duke thënë se mesazhi i Kosovës është një kushtrim për shqiptarët dhe shprehu përgëzimet e tij për suksesin e zgjedhjeve, duke e konsideruar atë një thirrje për të gjithë shqiptarët që të luftojnë për demokraci dhe liri.