Berisha: Regjimi i Ramës më i dekompozuari në Europë

Kreu i Partisë Demokratike, Sali Berisha, gjatë fjalimit të mbajtur në foltoren para Kryeministrisë, ka akuzuar qeverinë për atë që e cilësoi si “regjimi më karikaturial, më i turpshëm dhe më i dekompozuar në Europë dhe në botë”.

Berisha u shpreh se, sipas tij, regjimi i drejtuar nga kryeministri Edi Rama është i mbështetur mbi mashtrime, propagandë dhe trillime, ndërsa shtoi se “kudo që ta prekësh, rrjedh vjedhje, vjedhje dhe vetëm vjedhje të shqiptarëve”.

Në fjalën e tij para mbështetësve, kreu i opozitës deklaroi se qytetarët janë të vendosur t’i japin ndëshkimin që meriton qeveria aktuale, ndërsa akuzoi Ramën se po ecën drejt një grushti shteti dhe bllokimit të sistemit të drejtësisë.

“Regjimi pret nga ne qytetarët t’i japim ndëshkimin që meriton”, tha Berisha, duke shtuar se kryeministri, sipas tij, po sfidon dhe po poshtëron çdo ditë shqiptarët.

Ai e mbylli fjalimin me thirrje për rezistencë dhe ndryshim, duke e cilësuar vitin 2026 si “vitin e anti-diktaturave” dhe vitin e fitores së qytetarëve kundër autokracisë.