Berisha rikthehet në krye të PD-së: U krye, do çlirojmë Shqipërinë

Sali Berisha është rizgjedhur në krye të Partisë Demokratike.

Pas deklarimit të rezultatit, Berisha shprehu mirënjohjen për të gjithë ata që votuan në një proces që do të futet në histori si “mrekullia e shekullit të 21-të”.

Mes ovacioneve të qindra mbështetësve “u krye” ishte fraza e parë që tha kreu i PD-së.

“31 vite më parë një mik i madh i kombit tonë në vizitën e tij historike James Baker do u thoshte shqiptarëve se ‘ju do jeni të lirë të zgjidhni udhëheqësit tuaj’,” – u shpreh Berisha, ndërsa falënderoi anëtarët e PD-së dhe veçanërisht rininë në këtë ditë kaq të veçantë.

Berisha e cilësoi si detyrim shumë të madh besimin e tyre, ndërsa theksoi se kishte bindjen se do ja dilnin në misionin e tyre për lirinë dhe çlirimin e vendit nga pushteti aktual.

“Do bëj gjithçka që ëndrrat e të rinjve të bëhen realitet në këtë vend,” – tha Berisha.

43 680 demokratë votuan në total nga ku 40 820 votuan për Sali Berishën, ndërsa 2 532 për Ibsen Elezin, përkthyer kjo shifër kreu i PD-së fitoi me 93.45 për qind të votave. 5.8 për qind e demokratëve mbështetën Elezin në këtë garë, të vetmin që kandidoi përballë liderit historik të PD-së.

LEXONI GJITHASHTU:

• Sali Berisha rizgjidhet në krye të PD-së