Berisha takon Presidentin e Asamblesë Parlamentare të Këshillit të Evropës

Kryetari i Partisë Demokratike të Shqipërisë, Sali Berisha, zhvilloi sot një takim me Presidentin e Asamblesë Parlamentare të Këshillit të Evropës (PACE), Theodoros Roussopoulos. Takimi u përqendrua në disa tematika që për kreun e PD-së, mbeten shqetësuese, kryesisht situata politike dhe institucionale në Shqipëri.

Berisha vuri në dukje rolin thelbësor që luan Asambleja Parlamentare e Këshillit të Evropës në mbrojtjen e të drejtave dhe lirive themelore, si brenda vendit ashtu edhe në arenën ndërkombëtare.

Ai ngriti disa çështje që i konsideron urgjente dhe kërkoi vëmendje të shtuar nga PACE dhe institucionet e tjera demokratike ndërkombëtare, si dhe mbështetje për rikthimin e rendit demokratik në Shqipëri.

Presidenti Roussopoulos rikonfirmoi përkushtimin e PACE ndaj vlerave demokratike dhe shprehu gatishmërinë për të ndjekur me kujdes çështjet e ngritura gjatë këtij takimi.