Berisha uron Pavarësinë e Kosovës: Është shembull për rajonin

Kosova feston sot 17-vjetorin e shpalljes së Pavarësisë. Lidhur me këtë ditë të shënuar nuk ka munguar as reagimi nga lideri demokrat Sali Berisha i cili ka shprehur urimet e tij për qytetarët e Kosovës dhe të gjithë shqiptarët, duke e cilësuar këtë ngjarje si më të rëndësishmen pas shpalljes së Pavarësisë së Shqipërisë.

“Pavarësia e Kosovës është produkt i sakrificës së qytetarëve të saj dhe i vizionit të arkitektit të saj, Presidentit Ibrahim Rugova. Ai, me një strategji paqësore dhe gjenialitet politik, arriti të promovojë çështjen e Kosovës në arenën ndërkombëtare,” u shpreh Berisha. “Kjo pavarësi pati çmimin më të lartë, qindra mijëra jetë, qindra mijëra të tjerë etnikisht të spastruar nga Kosova, njohu aparteidin dhe segregacionin, shtypjen më të egër, gjenocidin e nacionalizmit të verbër serb në mes të Kosovës”, tha Berisha.

Ai vlerësoi gjithashtu kontributin e komandantit legjendar Adem Jashari dhe të luftës çlirimtare, duke nënvizuar rolin e ndërhyrjes ushtarake të NATO-s si një faktor vendimtar në arritjen e pavarësisë.

Duke folur për zhvillimet e pas-pavarësisë, Berisha theksoi se Kosova ka bërë hapa të mëdhenj në konsolidimin e demokracisë dhe është shndërruar në një model për rajonin.

Ai kritikoi ashpër atë që e quajti “tradhti të Tiranës zyrtare” dhe bashkëpunimin e saj me Beogradin, duke shtuar se përpjekjet për destabilizim kanë dështuar.

“Kosova u përball këto vite me një tradhti të Tiranës zyrtare, bashkërendim të saj me Beogradin, përpjekje për destabilizim dhe të gjitha këto dështuan dhe faktikisht sot Kosova është frymëzim për të gjitha vendet e rajonit, për rritjen progresive të mirëqenies, për funksionimin e shtetit ligjor”.

Në fund, ai përsëriti urimet për këtë ditë të shënuar, duke shprehur mirënjohjen për të gjithë ata që kontribuuan në realizimin e këtij akti madhor për kombin shqiptar.

LEXONI GJITHASHTU:

• Kosova 17 vjet shtet, Rama: Gëzuar Pavarësinë dhe mbarësi gjithmonë
• 17 vjet shtet, Osmani dhe Kurti: Asgjë nuk mund të ndalë Kosovën e lirë dhe sovrane